ஜோகூர் பாரு, மே 17 – இன்று தொடங்கியுள்ள 2026-ஆம் ஆண்டிற்கான பக்காத்தான் ஹராப்பான் (PH) மாநாடு, நாட்டின் மிக உன்னதமான எதிர்காலத்தை உறுதி செய்வதற்கான புதிய சூத்திரங்கள் மற்றும் உத்திகளை வகுப்பதற்கு உறுப்புக்கட்சி உறுப்பினர்களுக்குக் கிடைத்துள்ள ஒரு மிகச்சிறந்த தளமாகும் என்று மாநாட்டு இயக்குநர் டத்தோ ஃபஹ்மி ஃபட்சில் தெரிவித்துள்ளார்.
நான்கு ஆண்டுகளுக்குப் பிறகு இந்த மாநாடு மீண்டும் ஏற்பாடு செய்யப்பட்டுள்ளது. மலேசிய மக்களின் நல்வாழ்வை முதன்மையாகக் கொண்டு, பிரதிநிதிகள் அனைவரும் தங்களின் சிறந்த கருத்துகளையும் ஆற்றலையும் ஒன்றிணைப்பதற்கான ஒரு பொன்னான வாய்ப்பை இம்மாநாடு வழங்கியுள்ளது என்று தகவல் தொடர்பு அமைச்சருமான டத்தோ ஃபஹ்மி ஃபட்சில் சுட்டிக்காட்டினார்.
மாநாட்டின் வரவேற்புரையில் பேசிய அவர், தற்போது நேர்மறையான மற்றும் யாராலும் மறுக்க முடியாத பல நற்பலன்களைத் தந்து கொண்டிருக்கும் ‘மடாணி அரசாங்கத்தின்’ (Kerajaan MADANI) சாதனைகளை மறுமதிப்பீடு செய்வதற்கான ஒரு முக்கியக் களமாகவும் இம்மாநாடு திகழ்கிறது என்று பெருமிதத்துடன் குறிப்பிட்டார்.
"மலேசியாவிற்கு இன்னும் ஒரு சிறந்த எதிர்காலத்தை உத்தரவாதம் செய்ய நாம் மேற்கொள்ள வேண்டிய முயற்சிகள், முன்மொழிவுகள், சூத்திரங்கள் மற்றும் புதிய வடிவமைப்புகளைச் சமர்ப்பிக்கவும், நமது ஆற்றலையும் கருத்துகளையும் திரட்டவும் இந்த மாநாடு நமக்குக் கிடைத்துள்ள மிகச்சிறந்த வாய்ப்பாகும்," என்று ஜோகூர் பாரு, பெர்சாடா சர்வதேச மாநாட்டு மையத்தில் திரண்டிருந்த ஆயிரக்கணக்கான பிரதிநிதிகள் மத்தியில் அவர் பேசினார்.
மிக விரைவில் நடைபெறவிருக்கும் மலாக்கா மற்றும் ஜோகூர் மாநிலத் தேர்தல்களை (PRN) எதிர்கொள்வதற்கான தயார்நிலை குறித்து இந்த மாநாட்டில் முக்கியக் கவனம் செலுத்தப்படுவதை ஃபஹ்மி ஃபட்சில் தனது உரையில் அழுத்தமாகக் குறிப்பிட்டார்.
"பக்காத்தான் ஹராப்பான் கூட்டணியின் தலைவர் டத்தோ ஸ்ரீ அன்வார் இப்ராஹிம் நமக்கு வழங்கவிருக்கும் முக்கியச் செய்திகள், அதன் சாராம்சம் மற்றும் உத்வேகம் ஆகியவற்றை நாம் அனைவரும் ஒன்றிணைந்து செவிமடுக்கவுள்ளோம்.
இது பொதுத் தேர்தலுக்கு மட்டுமானது அல்ல; மிக விரைவில் நடைபெறவிருக்கும் மாநிலத் தேர்தல்களுக்கானதுமாகும். நாம் எத்தனை தொகுதிகளில் போட்டியிடப் போகிறோம், அனைத்துத் தொகுதிகளில் அல்லது ஒரு பகுதியில் என்பது போன்ற முக்கிய முடிவுகள் குறித்தும் நாம் இதில் கவனம் செலுத்துவோம்," என்று அவர் கூறினார்.
மேலும், மாநாடு நிறைவடைந்த பிறகு பிரதிநிதிகள் அனைவரும் ஒரு புதிய எழுச்சியுடனும் உத்வேகத்துடனும் தங்களின் அடிமட்டத் தொண்டர்களிடம் (grassroots) செல்ல வேண்டும் என்றும், ஒரு நீதியான தேசத்தைக் கட்டியெழுப்புவதில் தங்களின் உறுதிப்பாட்டை மேலும் வலுப்படுத்திக் கொள்ள வேண்டும் என்றும் அவர் கேட்டுக்கொண்டார்.
"தெக்காட் மடாணி, ஹராப்பான் ராக்யாட்" (Tekad MADANI, Harapan Rakyat) எனும் தூரநோக்குக் கருப்பொருளைக் கொண்டுள்ள இந்த மாநாட்டில், நாடு முழுவதிலும் இருந்து சுமார் 5,000 பிரதிநிதிகளும் முக்கியத் தலைவர்களும் பங்கெடுத்துள்ளனர்.
மலேசியப் பிரதமரும் பக்காத்தான் ஹராப்பான் கூட்டணியின் தலைவருமான டத்தோ ஸ்ரீ அன்வார் இப்ராஹிம் இன்று பிற்பகலில் மாநாட்டின் உச்சக்கட்ட நிகழ்வில் கலந்துகொண்டு சிறப்புரையாற்றி, மாநாட்டை அதிகாரப்பூர்வமாகத் தொடக்கி வைக்கவுள்ளார்.
இம்மாநாட்டில் டிஏபி (DAP) கட்சியின் பொதுச்செயலாளர் அந்தோணி லோக், அமானா (Amanah) கட்சியின் தலைவர் டத்தோ ஸ்ரீ முகமட் சாபு மற்றும் பக்காத்தான் ஹராப்பான் கூட்டணியின் தலைமைச் செயலாளர் டத்தோ ஸ்ரீ சைஃபுடின் நசுத்தியோன் இஸ்மாயில் உள்ளிட்ட பல முக்கியத் தலைவர்கள் உரையாற்றவுள்ளனர் என்பது குறிப்பிடத்தக்கது.
