ஷா ஆலம், மே 12: மத்திய கிழக்கு நாடுகளில் நிலவும் போர் பதற்றத்தால் ஏற்பட்டுள்ள உலகளாவிய எரிசக்தி நெருக்கடிக்கு மத்தியில், உள்நாட்டு எரிபொருள் விநியோகத்தை உறுதிப்படுத்தும் நோக்கில், 'பூடி95' (BUDI95) திட்டத்தின் கீழ் வழங்கப்படும் RON95 பெட்ரோலுக்கான மாதாந்திர ஒதுக்கீடு 150 லிட்டராகக் குறைக்கப்பட வாய்ப்புள்ளதாகத் துணை நிதியமைச்சர் லியூ சின் தோங் தெரிவித்துள்ளார்.
பெரித்தா ஹரியான் செய்தியின்படி, தற்போதைய பயன்பாட்டுத் தரவுகள் பெரும்பான்மையான மலேசியர்கள் தற்போதைய ஒதுக்கீட்டு அளவை விடக் குறைவாகவே பெட்ரோலைப் பயன்படுத்துவதைக் காட்டுவதாக அவர் குறிப்பிட்டார்.
இதற்கான காலக்கெடு இன்னும் நிர்ணயிக்கப்படவில்லை என்றாலும், 'பூடி95' திட்டம் அரசாங்கத்திற்குத் துல்லியமான பயன்பாட்டுத் தரவுகளை வழங்குவதால், தேவைக்கேற்ப மானியங்களைச் சீரமைப்பதும் விநியோகத்தை நிர்வகிப்பதும் எளிதாக இருக்கும் என்று அவர் விளக்கமளித்தார்.
தற்போது மாதத்திற்கு 200 லிட்டராக உள்ள இந்த ஒதுக்கீடு, முன்னர் 300 லிட்டராக இருந்தது குறிப்பிடத்தக்கது. இது குறித்துப் பேசிய அமைச்சர், "ஒதுக்கீடு குறைக்கப்பட்டாலும், நாட்டின் 80 சதவீத மக்கள் மாதத்திற்கு 200 லிட்டருக்கும் குறைவாகவே பெட்ரோல் பயன்படுத்துவதால், மக்களிடையே இதன் தாக்கம் மிகக் குறைவாகவே உள்ளது.
அடுத்தகட்டமாக இதனை 150 லிட்டராகக் குறைக்கத் திட்டமிடப்பட்டுள்ளது. ஏனெனில், மக்கள் தொகையில் 60 சதவீதம் பேர் 150 லிட்டருக்கும் குறைவாகவும், 50 சதவீதம் பேர் 100 லிட்டருக்கும் குறைவாகவுமே எரிபொருளைப் பயன்படுத்துகின்றனர்," என்று சுட்டிக்காட்டினார்.
அஃபின் குழுமம் (AFFIN Group) ஏற்பாடு செய்திருந்த ‘மலேசியாவை முன்னோக்கி நகர்த்துதல் 2026’ எனும் மாநாட்டில் கலந்துகொண்டு பேசிய அவர், எரிபொருள் பயன்பாட்டைக் குறைப்பது விநியோகச் சீரான தன்மைக்கு மிக அவசியம் என்றார். குறிப்பாக, குறைந்த வருமானம் பெறுபவர்கள் மற்றும் மோட்டார் சைக்கிள் பயன்படுத்துபவர்கள் எரிபொருள் விலை உயர்வால் பாதிக்கப்படாமல் இருப்பதை அரசாங்கம் உறுதி செய்யும் என்றும் அவர் கூறினார்.
மோட்டார் சைக்கிள் ஓட்டுநர்கள் மாதத்திற்குச் சராசரியாக 50 லிட்டர் பெட்ரோலை மட்டுமே பயன்படுத்துவதால், அவர்களின் வாழ்க்கைச் செலவு சுமையைக் குறைக்கத் தொடர்ந்து அதிக மானியம் வழங்கப்பட வேண்டியதன் அவசியத்தையும் அவர் வலியுறுத்தினார்.
கடந்த பிப்ரவரி இறுதியில் மத்திய கிழக்கில் வெடித்த புவிசார் அரசியல் மோதல்களால் கச்சா எண்ணெய் விலை உயர்ந்ததைத் தொடர்ந்து, அரசாங்கத்தின் மாதாந்திர எரிபொருள் மானியச் செலவு கிட்டத்தட்ட 10 மடங்கு அதிகரித்துள்ளது.
இந்த இக்கட்டான சூழலில், சபா மற்றும் சரவாக் மாநிலங்களுக்கான இலக்கு நிர்ணயிக்கப்பட்ட டீசல் மானிய முறையைச் செயல்படுத்துவது குறித்தும் அரசாங்கம் ஆலோசித்து வருவதாக லியூ சின் தோங் தெரிவித்தார்.
நீண்ட கால அடிப்படையில், பெட்ரோல் மீதான சார்புநிலையைக் குறைக்கப் பொதுப் போக்குவரத்து, மின்சார வாகனப் பயன்பாடு மற்றும் முறையான நகரத் திட்டமிடல் ஆகியவற்றில் முதலீடுகளை அதிகரிக்க வேண்டும் என்றும் அவர் கேட்டுக்கொண்டார்.
