ஷா ஆலம், மே 8 - மலேசியாவின் பெரும்பாலான மாநிலங்களில் இன்று மாலை 4 மணி வரை இடி, மின்னல் மற்றும் பலத்த காற்றுடன் கூடிய கனமழை பெய்யக்கூடும் என மலேசிய வானிலை ஆய்வு மையம் தனது புதிய எச்சரிக்கையில் தெரிவித்துள்ளது.
குறிப்பாக சிலாங்கூர், கோலாலம்பூர் மற்றும் புத்ராஜெயா ஆகிய கூட்டரசுப் பிரதேசங்களின் முழுப்பகுதிகளும் இந்த மோசமான வானிலை மாற்றத்தால் நேரடியாகப் பாதிக்கப்படும் என எதிர்பார்க்கப்படுகிறது.
தீபகற்ப மலேசியாவைப் பொறுத்தவரை பேராக் மாநிலத்தின் உலு பேராக், கோலா கங்சார், கிந்தா, கம்பார் உட்பட பல மாவட்டங்களிலும், கெடாவின் சிக் மற்றும் பாலிங் பகுதிகளிலும், பகாங் மாநிலத்தின் கேமரன் மலை, குவாந்தான், பெக்கான், ரொம்பின் ஆகிய இடங்களிலும் கனமழை பெய்ய வாய்ப்புள்ளது.
இதேபோல் நெகிரி செம்பிலான், மலாக்கா மற்றும் ஜோகூர் மாநிலத்தில் உள்ள பல மாவட்டங்களுக்கும் இந்த எச்சரிக்கை விடுக்கப்பட்டுள்ளது.
கிழக்கு மலேசியாவில் சரவாக் மாநிலத்தின் கூச்சிங், செரியான், சமரஹான், ஸ்ரீ அமான், பெத்தோங் மற்றும் மிரி உள்ளிட்ட பல இடங்களிலும், சபா மாநிலத்தின் பாப்பார், கோத்தா கினபாலு, தாவாவ், சண்டாக்கான் போன்ற பகுதிகளிலும் மழை நீடிக்கும் எனக் கணிக்கப்பட்டுள்ளது.
ஒரு மணிநேரத்திற்கு 20 மில்லி மீட்டருக்கும் அதிகமான மழைப்பொழிவு பதிவாகும் அறிகுறிகள் தென்படும்போது அல்லது அத்தகைய கனமழை ஒரு மணிநேரத்திற்கும் மேலாக நீடிக்கும் என எதிர்பார்க்கப்படும்போது இந்த இடி மின்னல் எச்சரிக்கை விடுக்கப்படுகிறது.
இத்தகைய எச்சரிக்கைகள் விடுக்கப்பட்ட நேரத்திலிருந்து அதிகபட்சமாக ஆறு மணிநேரம் வரை மட்டுமே செல்லுபடியாகும் என்பதால், பொதுமக்கள் வானிலை குறித்த தற்போதைய நிலவரத்தைத் தொடர்ந்து கவனிக்குமாறு கேட்டுக்கொள்ளப்படுகிறார்கள்.
