கடந்த ஆண்டு 285 கிலோமீட்டர் நீளமுள்ள குழாய்களை மாற்றுவதற்காக  சுமார் 800 மில்லியன் ரிங்கிட் செலவிட்டுள்ளது

ஷா ஆலம், ஏப்ரல் 30: கணக்கில் வராத நீர் (NRW) விகிதத்தைக் குறைக்கும் முயற்சியின் ஒரு பகுதியாக, கடந்த ஆண்டு 285 கிலோமீட்டர் நீளமுள்ள குழாய்களை மாற்றுவதற்காக சிலாங்கூர் அரசாங்கம் சுமார் 800 மில்லியன் ரிங்கிட் செலவிட்டுள்ளது.

மாநில உள்கட்டமைப்புத் துறை செயற்குழு உறுப்பினர் டத்தோ ஐஆர் இஷாம் ஹாஷிம் கூறுகையில், 2017 முதல் 2018 வரை சுமார் 34 விழுக்காடாக இருந்த NRW விகிதம், இந்த நடவடிக்கையின் மூலம் 27 விழுக்காடாகக் குறைக்கப்பட்டுள்ளது என்றார்.

இந்த ஆண்டு கூடுதலாக 300 கிலோமீட்டர் நீளத்திற்கு குழாய்களை மாற்றும் முயற்சி தொடரும் என்றும் அவர் குறிப்பிட்டார்.

NRW விகிதத்தைக் குறைப்பதற்கான செலவு மிகவும் அதிகம் என்பதை விளக்கிய அவர், ஒவ்வொரு ஒரு விழுக்காடு குறைப்புக்கும் சுமார் 300 மில்லியன் ரிங்கிட் வரை செலவாகும் என்று தெரிவித்தார்.

“NRW என்பது எளிதில் கையாளக்கூடிய ஒரு பிரச்சனை அல்ல, ஏனெனில் குழாய் மாற்றுவதற்கான செலவு அதிகம். ஆனால், குழாய்களை மாற்றுவதால் மட்டுமே இந்த பிரச்சனை தீர்ந்துவிடும் என்று நினைக்க வேண்டாம். நீர்த்தேக்கத் தொட்டிகள், கோபுரங்கள், வால்வுகள் மற்றும் பல கருவிகள், உதிரி பாகங்கள், மற்றும் நீர் திருட்டு போன்ற பல விஷயங்களைக் கருத்தில் கொள்ள வேண்டும்.”

"இந்த காரணங்களால், பலர் இதில் ஆர்வம் காட்டுவதில்லை. அதற்குப் பதிலாக சிலாங்கூரில் புதிய நீர் சுத்திகரிப்பு நிலையங்களைக் கட்டுவதற்கே விரும்புகிறார்கள். இது குழாய் மாற்றுவது மட்டுமல்ல, அதனைப் பொருத்துவதும் ஒரு சவால்தான். குறிப்பாக மக்கள் அடர்த்தியாக வாழும் பகுதிகளில் சாலைகளை மூட வேண்டியிருக்கும்," என்று அவர் கூறினார்.

சிலாங்கூர் சட்டமன்றத்தில் நடைபெற்ற சிலாங்கூர் பசுமைப் பொருளாதார நிகழ்ச்சி நிரல் (SAGE) இணையதளத்தின் அதிகாரப்பூர்வ அறிவிப்பு நிகழ்ச்சியின்போது அவர் இவ்வாறு தெரிவித்தார்.

மேலும்,  ஐஆர்   இஷாம் கூறுகையில், ஒவ்வொரு ஆண்டும் சுமார் ஒரு விழுக்காடு என்ற குறைப்பு திட்டத்தின் மூலம், சிலாங்கூரில் NRW விகிதத்தை 20 விழுக்காட்டுக்கும் கீழ் கொண்டுவர மாநில அரசு இலக்கு கொண்டுள்ளது.

"ஒவ்வொரு ஆண்டும் நாங்கள் NRW விகிதத்தைக் குறைப்பதில் வெற்றி கண்டுள்ளோம்; தற்போது சிலாங்கூரில் இது சுமார் 27 விழுக்காடாக உள்ளது. இருப்பினும், விகிதம் குறையக் குறைய, தேவைப்படும் செலவும் அதிகரிக்கிறது; இது 400 முதல் 500 மில்லியன் ரிங்கிட் வரை செல்லக்கூடும்."

"ஒரு விழுக்காடு குறைப்பு என்பது சிறிய விஷயமாகக் கருத வேண்டாம். ஏனெனில் இது சுமார் 6,500 மில்லியன் லிட்டர் நீரை உள்ளடக்கியது," என்று அவர் குறிப்பிட்டார்.

சமீபத்தில், தீபகற்ப மலேசியா மற்றும் லபுவானில் 33.4 விழுக்காடு NRW விகிதத்தால் மலேசியா 4 பில்லியன் ரிங்கிட்டிற்கும் அதிகமான இழப்பைச் சந்தித்துள்ளதாக ஊடகங்கள் செய்தி வெளியிட்டிருந்தது குறிப்பிடத்தக்கது.

2008-ஆம் ஆண்டில் சுமார் 1.4 பில்லியன் ரிங்கிட்டாக இருந்த இந்த இழப்பு, தற்போது இரண்டு மடங்கிற்கும் மேல் அதிகரித்துள்ளது. சுத்திகரிக்கப்பட்ட நீர் நாட்டிற்கு வருமானத்தை ஈட்டித் தராது இதற்குக் காரணமாகும்.