தஞ்சோங் காராங், ஜூன் 4: விவசாயத் துறையையும் மாநிலத்தின் உணவுப் பாதுகாப்பையும் வலுப்படுத்தும் நோக்கில், இரண்டாவது சிலாங்கூர் திட்டத்தில் (RS-2) நெல் விளைச்சலின் உற்பத்தியை அதிகரிப்பது முக்கிய கவனங்களில் ஒன்றாக இடம்பெற்றுள்ளது.
சம்பந்தப்பட்ட அனைத்து தரப்பினருடனும் மாநில அரசு ஆரம்பக்கட்ட பேச்சுவார்த்தைகளை நடத்தியுள்ளது என்றும், விரைவில் அடுத்தகட்ட கூட்டங்களை நடத்த திட்டமிட்டுள்ளதாகவும் உள்கட்டமைப்பு மற்றும் விவசாயத்துறை ஆட்சிக்குழு உறுப்பினர் டத்தோ இஷாம் ஹாஷிம் தெரிவித்தார்.
"இது RS-2 திட்டத்தில் இடம்பெற்றுள்ளது. ஆரம்ப கட்டமாக, நாங்கள் ஒன்றாக இணைந்து பேச்சுவார்த்தைகளை நடத்தியுள்ளோம். இனி முன்னெடுக்கப்படும் முறைகள் நெல் விவசாயத் துறைக்கு உண்மையாகவே சாதகமான தாக்கத்தை ஏற்படுத்துவதை உறுதிசெய்ய, மேலும் இரண்டு அல்லது மூன்று ஆய்வுக் கூட்டங்களை நாங்கள் தொடரவுள்ளோம்," என்று அவர் செய்தியாளர்களிடம் கூறினார்.
முன்னதாக, சுங்கை பூரோங்கில் உள்ள PPNS நெல் விதை உற்பத்தி மையத்தில், சிலாங்கூர் மாநில விவசாயிகள் அமைப்புக்கு (PPN) விவசாய இயந்திரங்களை வழங்கும் நிகழ்வை அவர் இன்று அதிகாரப்பூர்வமாகத் தொடங்கி வைத்தார்.
இதற்கிடையில், நெல் விவசாயம் 'மோனோகல்ச்சர்' (monoculture) அதாவது ஒரே நிலத்தில் தொடர்ந்து ஒரே வகையான பயிரை பயிரிடும் முறையாக வகைப்படுத்தப்பட்டுள்ளதால், இத்துறை பெரும்பாலும் பல்வேறு சவால்களை எதிர்கொள்கிறது என்று இஷாம் கூறினார்.
இந்த நிலைமையால், மண் வளம் குறைதல் மற்றும் நோய் தாக்குதல்கள் போன்ற பிரச்சனைகளால் நெற்பயிர்கள் அதிகம் பாதிக்கப்படுகின்றன என்று அவர் தெரிவித்தார்.
தற்போதைய காலகட்டத்தில் வளர்ந்து வரும் நவீன தொழில்நுட்பங்களின் பயன்பாடு, பயிர் உற்பத்தியை அதிகரிக்கவும் நாட்டின் முக்கிய உணவான அரிசி உற்பத்தியை மேம்படுத்தவும் பெரிதும் உதவும் என்று அவர் குறிப்பிட்டார்.
"நெல் ஒரு மோனோகல்ச்சர் பயிராகும். அது மீண்டும் மீண்டும் பயிரிடப்படும்போது, மண் வளம் மற்றும் நோய்கள் உள்ளிட்ட பல்வேறு சிக்கல்களுக்கு ஆளாகிறது.
"இதற்கான அணுகுமுறை விரிவானதாக இருக்க வேண்டும், வெறும் பூச்சிக்கொல்லி அல்லது உரங்களை மட்டுமே சார்ந்திருக்கக் கூடாது. இந்தோனேசியாவில் வெற்றிகரமாக செயல்படுத்தப்பட்ட நடைமுறைகள் உட்பட, தற்போதைய நவீன தொழில்நுட்பங்களைக் கொண்டு, நெல் உற்பத்தியை அதிகரிப்பதற்கான வழிகாட்டியாக நாம் அதனைப் பயன்படுத்த முடியும் என்று நான் உறுதியாக நம்புகிறேன்," என அவர் மேலும் கூறினார்.
கடந்த ஆண்டு, கோலா சிலாங்கூரில் உள்ள சாவா செம்பாடானில் (Sawah Sempadan) முன்னோடித் திட்டத்தின் மூலம், இரண்டு ஆண்டுகளில் ஐந்து பருவங்கள் (5M2T) நெல் பயிரிடும் ஆய்வை மேற்கொண்ட முதல் மாநிலமாக சிலாங்கூர் அறிவிக்கப்பட்டது.
விவசாயம் மற்றும் உணவுப் பாதுகாப்பு அமைச்சகத்தின் (KPKM) தகவல்படி, மலேசிய விவசாய ஆராய்ச்சி மற்றும் மேம்பாட்டு நிறுவனம் (MARDI) மற்றும் வடமேற்கு சிலாங்கூர் IADA ஆகியவற்றுடன் இணைந்து நடத்தப்பட்ட இந்த ஆய்வு, 2015 முதல் 2017 வரை 214.9 ஹெக்டேர் பரப்பளவில் 141 விவசாயிகளின் பங்களிப்புடன் வெற்றிகரமாகச் செயல்படுத்தப்பட்டது.
