செமஞ்சியில் டி.என்.பி (TNB) மின்மாற்றிகள் தயாரிக்கும் தொழிற்சாலையில் தீ விபத்து

2 ஜூன் 2026, 5:05 AM
செமஞ்சியில் டி.என்.பி (TNB) மின்மாற்றிகள் தயாரிக்கும் தொழிற்சாலையில் தீ விபத்து

ஷா ஆலம், ஜூன் 2:- செமஞ்சி, சுங்கை பூருண் தொழில்துறைப் பகுதியில் (Kawasan Perindustrian Sungai Purun) அமைந்துள்ள தெனாகா நேஷனல் பெர்ஹாட் (TNB) நிறுவனத்திற்கான மின்மாற்றிகள் (transformers) மற்றும் மின் உபகரணங்களை உற்பத்தி செய்யும் தொழிற்சாலை ஒன்றில் இன்று அதிகாலை தீ விபத்து ஏற்பட்டது.

இன்று அதிகாலை 4.29 மணியளவில் அவசர அழைப்பு வந்ததையடுத்து, செமஞ்சி தீயணைப்பு மற்றும் மீட்பு நிலையத்தைச் சேர்ந்த (BBP) வீரர்கள் சம்பவ இடத்திற்கு விரைந்ததாக சிலாங்கூர் தீயணைப்பு மற்றும் மீட்புத் துறையின் (JBPM) செயல்பாட்டு உதவி இயக்குநர் அகமட் முக்லிஸ் முக்தார் தெரிவித்தார்.

சுமார் 18.6 x 9.3 மீட்டர் பரப்பளவு கொண்ட அந்தத் தொழிற்சாலையில் தீயணைப்பு வீரர்கள் சென்றடைந்த போது, தீ கொழுந்துவிட்டு எரிந்து கொண்டிருந்தது.

"அந்த நேரத்தில் தொழிற்சாலையின் 40 விழுக்காடு சேதமடைந்திருப்பதாக மதிப்பிடப்பட்டது. வீரர்கள் சம்பவ இடத்திற்கு வந்தவுடன் உடனடியாக தீயைக் கட்டுப்படுத்தும் பணியில் ஈடுபட்டனர்," என்று அவர் இன்று வெளியிட்ட அறிக்கையில் தெரிவித்தார்.

இந்தத் தீயணைப்பு நடவடிக்கைக்கு பாங்கி மற்றும் காஜாங் தீயணைப்பு நிலைய வீரர்களும் உதவிக்கரம் நீட்டினர்.

தீயணைப்பு குழாய்கள் மற்றும் நீர் தாங்கி வாகனங்களிலிருந்து பெறப்பட்ட நீரைக் கொண்டு, 300 அடி நீளமுள்ள நான்கு குழாய்கள் மற்றும் மூன்று நீர் பீய்ச்சும் முனைகள் (nozzles) மூலம் தீயை அணைக்கும் பணி மேற்கொள்ளப் பட்டதாக அவர் கூறினார்.

"காலை 9.30 மணி நிலவரப்படி, 90 விழுக்காடு தீ வெற்றிகரமாக அணைக்கப் பட்டுவிட்டது. எஞ்சியுள்ள தீப்பொறிகளை அணைக்கும் பணி தொடர்ந்து நடைபெற்று வருகிறது," என்று அவர் விளக்கினார்.

இந்த நடவடிக்கையில் மொத்தம் 18 தீயணைப்பு வீரர்கள் ஈடுபட்டனர். செமஞ்சி நிலையத்திலிருந்து ஒரு தீயணைப்பு மீட்பு வாகனமும் (FRT), காஜாங் நிலையத்திலிருந்து ஒரு இலகுரக தீயணைப்பு மீட்பு வாகனமும் (LFRT), மேலும் பாங்கி நிலையத்திலிருந்து ஒரு FRT வாகனம் மற்றும் நீர் தாங்கி வாகனமும் பயன்படுத்தப்பட்டதாக அகமட் முக்லிஸ் குறிப்பிட்டார்.

அதிர்ஷ்டவசமாக, இச்சம்பவத்தில் உயிர்ச்சேதமோ அல்லது காயங்களோ ஏற்பட்டதாக எந்தத் தகவலும் பதிவாகவில்லை.

உங்கள் கருத்து என்ன?

அண்மைய செய்திகள்
MidRec
Media Selangor
எங்களைப் பற்றி

Media Selangor Sdn Bhd என்பது சிலாங்கூர் மந்திரி பெசார் கழகத்தின் (MBI) துணை நிறுவனம் ஆகும். இது மாநில அரசின் ஊடக ஏஜென்ஸியாக செயல்படுகிறது. Selangorkini மற்றும் SelangorTV ஆகியவற்றுடன் கூட, இந்த நிறுவனம் சீனம், தமிழும் மற்றும் ஆங்கிலத்திலும் இணையதளங்கள் மற்றும் பத்திரிகைகளை வெளியிடுகிறது.