பிறரைச் சார்ந்து நிற்காமல் மாநிலத் தேர்தலை எதிர்கொள்ளும் பலம் நெகிரி செம்பிலான் பக்காத்தான் ஹராப்பானுக்கு உள்ளது - அந்தோணி லோக்

சிரம்பான், மே 25 - மற்ற எந்தத் தரப்பினரையும் சார்ந்திருக்காமல், மாநிலத் தேர்தலை (PRN) எதிர்கொள்ளும் ஆற்றலும் அரசியல் பலமும் நெகிரி செம்பிலான் பக்காத்தான் ஹராப்பானுக்கு (PH) உள்ளது என்று அதன் துணைத் தலைவர் அந்தோணி லோக் கூறினார்.

பல்வேறு சவால்களை எதிர்கொண்ட போதிலும், 2018 முதல் 2023 வரை அந்த மாநிலத்தில் பக்காத்தான் ஹராப்பான் தனித்து ஆட்சி செய்ய முடிந்தது என்று அவர் குறிப்பிட்டார்.

"2020-ஆம் ஆண்டு மத்திய அளவில் 'ஷெரட்டன் நகர்வு' நிகழ்ந்தபோது, நெகிரி செம்பிலான் உறுதியாக நிலைத்திருந்தது. கோவிட்-19 கால கட்டத்திலும், எங்களிடம் 20 இடங்கள் மட்டுமே இருந்த போதிலும், நாங்கள் தனியாக ஆட்சியைத் தக்க வைத்துக் கொண்டோம், அரசாங்கம் கவிழவில்லை."

"இது பக்காத்தான் ஹராப்பானுக்கு அதன் சொந்த பலம் இருப்பதையும், எங்கள் நிர்வாகத்தின் மீது மக்கள் வைத்திருக்கும் நம்பிக்கை உறுதியாக இருப்பதையும் நிரூபிக்கிறது," என்று சிரம்பான் நாடாளுமன்றத் தொகுதி அளவிலான 2025-ஆம் ஆண்டுக்கான சிஜில் பெலஜரான் மலேசியா (SPM) சிறந்த மாணவர்களுடனான தேநீர் விருந்துக்குப் பிறகு அவர் செய்தியாளர்களிடம் தெரிவித்தார்.

14-வது பொதுத் தேர்தலில் (PRU14), 36 சட்டமன்றத் தொகுதிகளில் 20-ஐ வென்ற பிறகு பக்காத்தான் ஹராப்பான் நெகிரி செம்பிலானில் அரசாங்கத்தை அமைத்தது.

டிஏபி-யின் தலைமைச் செயலாளருமான அந்தோனி லோக், கூட்டணியின் உள் பலம், நிர்வாகத்தின் நிலைத்தன்மை மற்றும் மக்களுக்கு ஆற்றிய சேவையின் பதிவு ஆகியவை எதிர்கால அரசியல் சவால்களை எதிர்கொள்வதில் பக்காத்தான் ஹராப்பானின் முக்கிய அடித் தளமாகத் தொடர வேண்டும் என்றார்.

இதற்கிடையில், ஜோகூர் அல்லது மலாக்கா மாநிலங்கள் தங்களது சட்டமன்றங்களை விரைவில் கலைத்தால், அம் மாநிலங்களுடன் ஒரே நேரத்தில் மாநிலத் தேர்தலைச் சந்திக்கும் சாத்தியக் கூறுக்கு நெகிரி செம்பிலான் பக்காத்தான் ஹராப்பான் உறுப்பினர்கள் தயாராக இருக்க வேண்டும் என்பதை லோக் மீண்டும் வலியுறுத்தினார்.

இருப்பினும், பக்காத்தான் ஹராப்பான் உயர்மட்டத் தலைமையை ஆலோசித்து, நெகிரி செம்பிலான் மாமன்னரின் ஒப்புதலைப் பெற்ற பிறகு, மந்திரி பெசார் டத்தோஸ்ரீ அமினுதீன் ஹருண் எடுக்கும் முடிவைப் பொறுத்தே இது அமையும் என்று அவர் கூறினார்.

கடந்த வாரம் ஜோகூரில் நடைபெற்ற பக்காத்தான் ஹராப்பான் 2026 மாநாட்டில் உரையாற்றிய அதன் தலைவர் டத்தோ ஸ்ரீ அன்வார் இப்ராஹிம், வரவிருக்கும் மாநிலத் தேர்தல்களில் அனைத்து இடங்களிலும் போட்டியிட அம்னோ மற்றும் பாரிசான் நேஷனல் (BN) முடிவு செய்தால், ஜோகூர் மற்றும் நெகிரி செம்பிலானில் உள்ள அனைத்து சட்டமன்றத் தொகுதிகளிலும் வேட்பாளர்களை நிறுத்த பக்காத்தான் ஹராப்பான் தயாராக உள்ளது என்று கூறியிருந்தார்.