'ரோட் டு கோல்ட்' (RTG) குழுவில் மீண்டும்  டிராக் சைக்கிளோட்ட வீரரான டத்தோ முஹம்மது அசிசுல் ஹஸ்னி அவாங்

நாட்டின் புகழ்பெற்ற டிராக் சைக்கிளோட்ட வீரரான டத்தோ முஹம்மது அசிசுல்ஹஸ்னி அவாங்கை மீண்டும் தங்கள் உயர்மட்ட திட்டத்தில் சேர்ப்பது குறித்து 'ரோட் டு கோல்ட்' (RTG) குழு பரிசீலித்து வருகிறது.

இருப்பினும், 'தி பாக்கெட் ராக்கெட்மேன்' என்று அழைக்கப்படும் அவர், உலகின் முதல் எட்டு சிறந்த வீரர்களுக்குள் இடம் பெற வேண்டும் என்ற நிபந்தனையை பூர்த்தி செய்ய வேண்டும் என்று அதன் ஒருங்கிணைப்பாளர் டத்தோ ஸ்டூவர்ட் ராமலிங்கம் கூறினார்.

"டத்தோ (முஹம்மது) அசிசுல்ஹஸ்னியின் செயல்திறன் படிப்படியாக மேம்பட்டு வருவதால், அவர் RTG திட்டத்தில் மீண்டும் ஏற்றுக்கொள்ளப்படுவார் என்று நாங்கள் நம்புகிறோம். அவர் மீண்டும் RTG-க்கு திரும்புவதை நாங்கள் எப்போதும் வரவேற்கிறோம்," என்றார்.

"ஆனால், அனைவருக்கும் தெரிந்தபடி, RTG-யின் தகுதிகள் தெளிவாக உள்ளன. அவர் உலகின் முதல் எட்டு இடங்களுக்குள் வந்தவுடன், தானாகவே மீண்டும் திட்டத்தில் சேர்க்கப்படுவார்," என்று அவர் நேற்று தெரிவித்தார்.

சமீபத்திய உலகக் கோப்பை டிராக் தொடரில் கெய்ரின் பிரிவில் இரண்டு தங்கப் பதக்கங்களை வென்றதன் மூலம், முஹம்மது அசிசுல்ஹஸ்னி தற்போது உலகத் தரவரிசையில் 23-வது இடத்தில் உள்ளார்.

அதுமட்டுமின்றி, நீலாய் மற்றும் ஆஸ்திரேலியாவின் பெர்த் நகரில் நடைபெற்ற அதே உலகக் கோப்பை டிராக் தொடரில் தனிநபர் ஸ்பிரிண்ட் பிரிவிலும் அவர் வெண்கலப் பதக்கம் வென்று அசத்தினார்.