வெள்ளிக்கிழமை முதல் தொடர் விடுமுறையை முன்னிட்டு, பிளஸ் நெடுஞ்சாலையில் 2.2 மில்லியன் வாகனங்கள்

கோலாலம்பூர், மே 20: வரவிருக்கும் வெள்ளிக்கிழமை தொடங்கும் தொடர் விடுமுறையை முன்னிட்டு, பிளஸ் மலேசியா பெர்ஹாட் (பிளஸ்) தனது நெடுஞ்சாலை வலையமைப்பை ஒவ்வொரு நாளும் 2.2 மில்லியனுக்கும் அதிகமான வாகனங்கள் பயன்படுத்தும் என எதிர்பார்க்கிறது.

கிழக்கு கடற்கரை நெடுஞ்சாலை 2-இல் (LPT2), போக்குவரத்து நெரிசல் உச்ச நாட்களில் ஒரு நாளைக்கு 50,000 வாகனங்கள் வரை அதிகரிக்கும் என கணிக்கப்பட்டுள்ளது.

பள்ளி அரையாண்டு விடுமுறை, ஹரி ராயா ஹஜி, விசாக தினம் மற்றும் மாட்சிமை தங்கிய மாமன்னரின் அதிகாரப்பூர்வ பிறந்தநாள் ஆகிய மூன்று முக்கிய கொண்டாட்டங்கள் ஒரே நேரத்தில் வருவதால் இந்த குறிப்பிடத்தக்க போக்குவரத்து அதிகரிப்பு ஏற்படுகிறது என்று பிளஸ் இன்று வெளியிட்ட அறிக்கையில் தெரிவித்துள்ளது.

"கிள்ளான் பள்ளத்தாக்கில் இருந்து வெளியேறும் வாகனங்களுக்கு மே 22, 23, 26, 28, 29, 30 மற்றும் 31, 2026 ஆகிய தேதிகள் உச்ச நாட்களாக இருக்கும். அதேவேளையில், கிள்ளான் பள்ளத்தாக்கிற்கு திரும்பும் பயணங்களுக்கு ஜூன் 4, 5, 6 மற்றும் 7, 2026 ஆகிய தேதிகள் உச்சகட்ட நாட்களாக இருக்கும்."

"நெடுஞ்சாலைப் பயனர்கள் நெரிசலைத் தவிர்க்க, தங்கள் சொந்த ஊருக்குத் திரும்பும் அல்லது விடுமுறைப் பயணத்தைத் முன்கூட்டியே திட்டமிடுமாறு அறிவுறுத்தப் படுகிறார்கள். பொதுமக்கள் பிளஸ் செயலியில் உள்ள MyPLUS-TTA டிஜிட்டல் பயண அட்டவணையைப் பார்க்கவும் பதிவிறக்கம் செய்யவும் ஊக்குவிக்கப்படுகிறார்கள்," என்று அந்த அறிக்கையில் மேலும் தெரிவிக்கப்பட்டுள்ளது.

பயனர்களின் பாதுகாப்பு மற்றும் வசதியை சிறந்த மட்டத்தில் உறுதி செய்வதற்காக, பிளஸ் 33 முக்கிய போக்குவரத்துப் பகுதிகளில் 'ஸ்மார்ட் லேன்' வசதியை செயல்படுத்தும். மேலும், 500-க்கும் மேற்பட்ட பிளஸ்ரோண்டா மற்றும் LPT2 ரோண்டா குழுவினர் 24 மணி நேர ரோந்துப் பணியில் ஈடுபடுத்தப்படுவார்கள்.

பிளஸ் தனது செயல்பாடுகளை மேம்படுத்துவதோடு, சுங்கச்சாவடிகளில் உள்ள அனைத்து பாதைகளையும் திறக்கும். மேலும், போக்குவரத்து கண்காணிப்பு மையம் (TMC) மூலம் நிகழ்நேர போக்குவரத்தைக் கண்காணிக்கும்.

இது தவிர, மலேசிய காவல்துறை (PDRM), சாலைப் போக்குவரத்துத் துறை (JPJ), மலேசிய நெடுஞ்சாலை ஆணையம் (LLM) மற்றும் தொடர்புடைய பிற ஏஜென்சிகளுடன் இணைந்து, சீரான போக்குவரத்திற்கு உதவுவதிலும், பயனர்களின் பாதுகாப்பை உகந்த நிலையில் உறுதி செய்வதிலும் பிளஸ் உறுதியாக உள்ளது.

பயனர்கள் பிளஸ் செயலி, புத்ரி மெய்நிகர் உதவியாளர், X செயலியின் @plustrafik மற்றும் @lpt2trafik பக்கங்கள், தேர்ந்தெடுக்கப்பட்ட இடங்களில் உள்ள மின்னணு செய்தி பலகைகள் (VMS) மற்றும் நாட்டின் முக்கிய வானொலி நிலையங்கள் மூலம் சமீபத்திய போக்குவரத்துத் தகவல்களைப் பெறலாம்.

"இந்த பண்டிகைக் காலத்தில் பயணத்தைத் திட்டமிடுவதற்கும், தற்போதைய போக்குவரத்து நிலையை அறிவதற்கும் பிளஸ் செயலி, வேஸ் அல்லது கூகுள் மேப்ஸ் ஆகியவற்றைப் பயன்படுத்தவும் நெடுஞ்சாலைப் பயனர்களுக்கு பிளஸ் அறிவுறுத்துகிறது," என அந்த அறிக்கையில் கூறப்பட்டுள்ளது.

பயனர்கள் தங்கள் டச் 'என் கோ அட்டை அல்லது இ-வாலெட்டில் (RFID மற்றும் JustGO பயனர்களுக்காக) போதுமான இருப்பு இருப்பதை உறுதி செய்யவும், வாகனம் நல்ல நிலையில் இருப்பதையும், பாதுகாப்பாக வாகனம் ஓட்டுவதையும், போதுமான ஓய்வு பெறுவதையும், அனைவரின் பாதுகாப்பிற்காக போக்குவரத்து விதிகளைப் பின்பற்றுவதையும் நினைவில் கொள்ள வேண்டும்.

அவசர உதவி தேவைப்பட்டால், பயனர்கள் பிளஸ்லைனை 1800-88-0000 என்ற எண்ணிலும் அல்லது LPT2லைனை 1800-88-0220 என்ற எண்ணிலும் தொடர்பு கொள்ளலாம்.