தனா மேராவில் 58 பேர் கைது: சிங்கப்பூர் ஆண்களை இலக்கு வைத்த 'லவ் ஸ்கேம்' கும்பல் முறியடிப்பு

சிங்கப்பூர் ஆண்களை இலக்காகக் கொண்டு செயல்பட்ட 'லவ் ஸ்கேம்' மோசடிக் கும்பலின் செயல்பாட்டு மையத்தில் நேற்று நடத்தப்பட்ட சோதனையில் 58 பேர் கைது செய்யப்பட்டனர்.

கிளந்தான் மாநில போலீஸ் தலைவர், டத்தோ முகமட் யூசோப் மாமாட் கூறுகையில், கிளந்தான் காவல்துறை தலைமையகத்தின் வர்த்தகக் குற்றப் புலனாய்வுத் துறையின் உளவுத்துறையின் அடிப்படையில், இந்தச் சோதனை நேற்று மாலை 4.30 மணியளவில் மேற்கொள்ளப்பட்டது என்றார்.

கைது செய்யப்பட்டவர்களில் 53 ஆண்கள் மற்றும் ஐந்து பெண்கள் அடங்குவர். 20 முதல் 30 வயதுக்குட்பட்ட இவர்களில் 56 பேர் வெளிநாட்டினர், இருவர் உள்ளூர்வாசிகள்.

"இதில் 49 சீன ஆண்கள், தலா ஒருவர் மியன்மார், இந்தியா, பாகிஸ்தான் நாட்டைச் சேர்ந்தவர்கள் மற்றும் ஒருவர் உள்ளூர் ஆண். பெண்களில், ஒருவர் உள்ளூர்வாசி, ஒருவர் மியன்மார் மற்றும் மூவர் சீனாவைச் சேர்ந்தவர்கள்," என்று அவர் இன்று தானா மேரா மாவட்ட போலீஸ் தலைமையகத்தில் நடந்த செய்தியாளர் கூட்டத்தில் தெரிவித்தார்.

கும்பல் வாடகைக்கு எடுத்திருந்த ஓர் உல்லாச விடுதியில் உள்ள வளாகம், இந்த மோசடி நடவடிக்கைகளை மேற்கொள்வதற்கான பிரத்யேக அழைப்பு மையமாகப் பயன்படுத்தப்பட்டுள்ளது.

இந்தோனேசியப் பெண்களாகத் தங்களை ஆள்மாறாட்டம் செய்து, சிங்கப்பூர் ஆண்களின் உணர்வுகளை ஏமாற்றி, அவர்களை இலக்கு வைத்து இந்த மோசடி கும்பல் செயல்பட்டுள்ளது.

"‘ஹாய்’ என்ற குறுஞ்செய்தியை அனுப்பி, வாட்ஸ்அப் செயலி மூலம் வீடியோ  தொடர்பை ஏற்படுத்தி அழைப்புகள் இன்றி உறவை மேம்படுத்தும், பின்னர் பணத்தைப் பெறுவதற்காகப் பாதிக்கப்பட்டவர்களை ஏமாற்றுவதே இவர்களின் செயல்பாட்டு முறையாகும்," என்று அவர் கூறினார்.

கடந்த மார்ச் மாத இறுதியில் இருந்து செயல்பட்டு வரும் இந்தக் கும்பல், தினமும் மதியம் 12 மணி முதல் நள்ளிரவு 12 மணி வரை செயல்பட்டது என்றும், இது மூன்று மேற்பார்வையாளர்கள் மற்றும் 55 ஆபரேட்டர்களால் நிர்வகிக்கப்பட்டது என்றும் முகமட் யூசோப் தெரிவித்தார்.

"நிலையான இணைய இணைப்பை உறுதி செய்வதற்கும், அதிகாரிகளால் கண்காணிக்கப் படுவதைத் தவிர்ப்பதற்கும், செயற்கைக்கோள் இணையம் உட்பட குறைந்தது எட்டு திசைவிகளை (routers) இந்தக் குழு பயன்படுத்தியதும் கண்டறியப்பட்டது," என்றார் அவர்.

சோதனையின் போது, 46 கணினிகள், ஐந்து மடிக்கணினிகள், 118 கைபேசிகள் மற்றும் எட்டு திசைவிகள் பறிமுதல் செய்யப்பட்டன. இவற்றின் மொத்த மதிப்பு சுமார் 179,000 ரிங்கிட் என மதிப்பிடப்பட்டுள்ளது.

"பாதிக்கப்பட்ட சிங்கப்பூர் குடிமக்களிடமிருந்து இதுவரை எந்தப் புகாரும் பெறப்படாததால், பாதிக்கப்பட்டவர்களின் மொத்த இழப்பை எங்களால் இன்னும் மதிப்பிட முடியவில்லை."

"கைது செய்யப்பட்ட வெளி நாட்டினரில், 33 பேரிடம் செல்லுபடியாகும் பயண ஆவணங்கள் இருந்தன, மற்றவர்களிடம் ஆவணங்கள் இல்லை," என்று அவர் மேலும் கூறினார்.

குற்றவியல் சட்டத்தின் 420 மற்றும் 120B பிரிவுகளின் கீழ் இந்த வழக்கு விசாரிக்கப்படுகிறது. சந்தேக நபர்கள் அனைவரும் மேலதிக விசாரணைக்கு உதவுவதற்காக இன்று முதல் நான்கு நாட்களுக்குத் தடுப்புக் காவலில் வைக்கப்பட்டுள்ளனர்.

ஆன்லைன் மோசடிக் குற்றங்களை போலீஸ் தீவிரமாகக் கருதுவதாகவும், இதுபோன்ற நடவடிக்கைகளைத் தடுக்க முயற்சிகளைத் தீவிரப்படுத்தும் என்றும் முகமட் யூசோப் வலியுறுத்தினார்.

இது குறித்து ஏதேனும் தகவல் தெரிந்தால், பொதுமக்கள் விசாரணைக்கு உதவுமாறு போலீசாருக்குத் தகவல் வழங்குமாறு கேட்டுக் கொள்ளப்படுகிறார்கள்.