ஷா ஆலாம், ஏப்ரல் 23: மலேசியாவின் சில மாநிலங்களில் இன்று நண்பகல் 12 மணி வரை இடி, மின்னலுடன் கூடிய கனமழை பெய்யக்கூடும் என மலேசிய வானிலை ஆய்வு மையம் எச்சரிக்கை விடுத்துள்ளது.
இந்த வானிலை மாற்றத்தினால் குறிப்பாக பேராக், பகாங் மற்றும் சபா ஆகிய மாநிலங்களில் உள்ள குறிப்பிட்ட சில மாவட்டங்கள் பாதிக்கப்படக்கூடும் எனத் தெரிவிக்கப்பட்டுள்ளது.
பேராக் மாநிலத்தில் கம்பார், ஹிலிர் பேராக், பாதாங் பாடாங் மற்றும் முவாலிம் ஆகிய பகுதிகளிலும், பகாங் மாநிலத்தில் கேமரன் மலைப் பகுதியிலும் பலத்த மழை பெய்யக்கூடும் என எதிர்பார்க்கப்படுகிறது.
அதேபோன்று, சபா மாநிலத்தில் தவாவ், குனாக் மற்றும் செம்பூர்ணா ஆகிய மாவட்டங்களில் மோசமான வானிலை நிலவக்கூடும் என அந்த ஆய்வு மையம் சுட்டிக்காட்டியுள்ளது.
ஒரு மணி நேரத்திற்கு 20 மில்லி மீட்டருக்கும் அதிகமான மழைப்பொழிவு பதிவாகும் அறிகுறிகள் தென்படும் போதும் அல்லது இடியுடன் கூடிய மழை ஒரு மணி நேரத்திற்கும் மேலாக நீடிக்கும் என எதிர்பார்க்கப்படும் போதும் இத்தகைய எச்சரிக்கைகள் விடுக்கப்படுகின்றன.
இது குறித்து மெட்மலேசியா இன்று வெளியிட்டுள்ள அறிக்கையில், இடி மின்னல் எச்சரிக்கை என்பது குறுகிய கால அளவீடு என்றும், இது வெளியிடப்பட்ட நேரத்திலிருந்து அதிகபட்சம் ஆறு மணி நேரம் மட்டுமே செல்லுபடியாகும் என்றும் விவரித்துள்ளது.
மோசமான வானிலை நிலவும் வேளையில் பொதுமக்கள் அனைவரும் கூடுதல் விழிப்புணர்வுடன் இருக்குமாறு கேட்டுக்கொள்ளப்படுகிறார்கள்.
குறிப்பாக, வெளிப்பகுதிகளில் மேற்கொள்ளப்படும் நடவடிக்கைகளைத் தவிர்க்குமாறும், திடீர் வெள்ளம் மற்றும் பலத்த காற்றினால் ஏற்படக்கூடிய ஆபத்துகளைக் கருத்தில் கொண்டு தகுந்த பாதுகாப்பு நடவடிக்கைகளை முன்னெடுக்குமாறும் அதிகாரிகள் அறிவுறுத்தியுள்ளனர்.
