செப்பக் தக்ரோ அகாடமி வளாகத்தின் நிர்வாகத்தை மேம்படுத்த 2 மில்லியன் வெள்ளி நிதி ஒதுக்கீடு

கோலாலம்பூர், ஏப்ரல் 14: மலேசிய செப்பக்தாக்ரா அகாடெமி வளாகத்தின் நிர்வாகத்தை வலுப்படுத்துவதற்காக, மலேசிய செப்பக்தாக்ரா சம்மேளனத்திற்கு (PSM) 2 மில்லியன் ரிங்கிட் ஒதுக்கீடு வழங்கப்படும் என்று பிரதமர் டத்தோஸ்ரீ அன்வார் இப்ராஹிம் இன்று அறிவித்தார்.

நிதி அமைச்சருமான அன்வார், இந்த ஒதுக்கீடு அகாடெமி வளாகத்தில் பயிற்சி பெறும் வீரர்களின் நலன், உணவு, வசதிகள் மற்றும் உடைகள் போன்றவற்றை உள்ளடக்கியது என்று கூறினார்.

"வீரர்கள் நன்கு கவனிக்கப்படுவதை உறுதிசெய்ய நான் ஒப்புக்கொண்டேன். நான் அறிவிக்கும் இந்த ஒதுக்கீட்டில் ஒரு பகுதி பயிற்சி கல்லூரியில் உள்ள வீரர்களின் உணவு, பானம், வசதிகள் மற்றும் ஆடைகளுக்குப் பயன்படுத்தப்படும்," என்று அவர் கூறினார்.

"இரண்டாவதாக, இது சம்மேளனத்தின் (PSM) செயல்பாடுகளுக்கும், மூன்றாவதாக அகாடெமிக்கும் உதவும்," என்று அவர் அந்த வளாகத்தின் திறப்பு விழாவில் உரையாற்றும்போது தெரிவித்தார்.

இந் நிகழ்ச்சியில் இளைஞர் மற்றும் விளையாட்டுத் துறை அமைச்சர் டாக்டர் முகமது தௌபிக் ஜொஹாரி, பிரதமர் துறை அமைச்சர் (கூட்டரசுப் பிரதேசம்) ஹன்னா இயோ, மலேசிய ஒலிம்பிக் மன்றத் தலைவர் டான்ஸ்ரீ முகமது நார்சா சக்காரியா மற்றும் PSM தலைவர் டத்தோ முகமது சுமைலி ரெடுவான் ஆகியோரும் கலந்து கொண்டனர்.

கம்போங் பாரு, ஜாலான் ராஜா மூடா அப்துல் அசிஸில் அமைந்துள்ள 6 மில்லியன் ரிங்கிட் மதிப்பிலான இந்த வளாகத்தில், தடகள வீரர்களுக்கான தங்குமிடம், உடற்பயிற்சிக் கூடம், கற்றல் அறைகள் மற்றும் ஒரே கூரையின் கீழ் பயிற்சி அரங்கம் உள்ளிட்ட பல்வேறு வசதிகள் உள்ளன.

இதற்கிடையில், அடுத்த மாதம் தித்திவங்சா அரங்கில் நடைபெறவுள்ள 2026 செப்பக்தாக்ரா உலகக் கிண்ணப் போட்டியை வெற்றிகரமாக நடத்த PSM-க்கு உதவுவதற்காக, இளைஞர் மற்றும் விளையாட்டுத் துறை அமைச்சு 1 மில்லியன் ரிங்கிட் ஒதுக்கீட்டிற்கு ஒப்புதல் அளித்துள்ளதாகவும் அன்வார் கூறினார்.

பிரீமியர் மற்றும் டிவிஷன் 1 போட்டிகளை உள்ளடக்கிய இந்த உலகக் கிண்ணப் போட்டி, இந்த ஆண்டு மே 16 முதல் 23 வரை நடைபெற உள்ளது.

-- பெர்னாமா