மலேசியாவின் உத்திபூர்வ  மற்றும் அனைத்துலக தொழில்துறை ஜாம்பவான்களுடன் கொண்டுள்ள வலுவான  உறவுகள்,  எரிசக்தி நெருக்கடியை   சமாளிக்க நாட்டிற்கு உதவுகின்றன  

கோலாலம்பூர், ஏப்ரல் 14: உலகளாவிய உற்பத்திச் சங்கிலியில் மலேசியாவின் உத்திப்பூர்வ நிலை மற்றும் அனைத்துலக தொழில்துறை ஜாம்பவான்களுடன் கொண்டுள்ள வலுவான தூதாண்மை உறவுகள், உலகளாவிய எரிசக்தி நெருக்கடியின் தாக்கங்களை மிகவும் திறம்படச் சமாளிக்க நாட்டிற்கு உதவுகின்றன.

இந்த அனுகூலங்கள், அவசர காலங்களில் மாற்று எரிபொருள் ஆதாரங்களைப் பெறுவதற்கான இடத்தையும் வாய்ப்புகளையும் மலேசியாவுக்கு வழங்குவதாக தேசிய பாதுகாப்பு மன்றத்தின் (MKN) தலைமை இயக்குநர் டத்தோ ராஜா நூர்ஷிர்வான் ஜைனல் அபிடின் கூறினார்.

உதாரணமாக, உலகம் முழுவதும் செயல்பாடுகளைக் கொண்டுள்ள பெட்ரோலியம் நேஷனல் பெர்ஹாட் (பெட்ரோனாஸ்), அதன் உலகளாவிய வலையமைப்பு மற்றும் தொழில்துறை ஜாம்பவான்களுடனான நெருங்கிய உறவுகளை இந்த நோக்கத்திற்காகப் பயன்படுத்திக் கொள்ளலாம் என்று அவர் கூறினார்.

"உலக உற்பத்திச் சங்கிலியில் நாம் ஒரு உத்திப்பூர்வமான இடத்தில் இருக்கிறோம், எனவே முக்கிய நிறுவனங்களுடன் நமக்கு நல்ல உறவு உள்ளது. பெட்ரோனாஸ் உலகம் முழுவதும் செயல்படுவதால், எரிபொருள் ஆதாரங்களைப் பெற அந்த உறவுகளை அவர்களால் பயன்படுத்த முடியும்," என்றார்.

இன்று இரவு பெர்னாமா தொலைக்காட்சியில் ஒளிபரப்பான 'உலகளாவிய எரிசக்தி நெருக்கடியை எதிர்கொள்ளுதல்: நாட்டின் தயார்நிலை மற்றும் பின்னடைவு' என்ற தலைப்பிலான 'ருவாங் பிச்சாரா' நிகழ்ச்சியில் விருந்தினராகக் கலந்துகொண்டபோது அவர் இவ்வாறு கூறினார்.

இதற்கிடையில், வெளிநாடுகளுடனான வலுவான இருதரப்பு தூதாண்மை உறவுகள், நெருக்கடியால் ஏற்படும் உலகளாவிய விநியோகச் சங்கிலி இடையூறுகளின் தாக்கத்தைத் தணிக்க மலேசியாவுக்கு உதவியுள்ளதாகவும் ராஜா நூர்ஷிர்வான் குறிப்பிட்டார்.

புதன்கிழமை மலேசியாவுக்கு வருகை தரவிருக்கும் ஆஸ்திரேலியப் பிரதமர் அந்தோனி அல்பானீஸின் பயணம், இரு நாடுகளுக்கும் இடையிலான எரிபொருள் விநியோகம் தொடர்பான விவகாரங்கள் குறித்தும் விவாதிக்கும் என்றும் அவர் தெரிவித்தார்.

"எனவே, உலகின் பல நாடுகளுடன் ஒப்பிடும்போது, இந்தச் சூழ்நிலையைச் சிறப்பாகக் கையாள்வதற்கு இதுபோன்ற உறவுகள் நமக்கு உதவுகின்றன," என்று அவர் மேலும் கூறினார்.