ஷா ஆலம், ஆக. 25 - இங்குள்ள செக்சன் 24இல் உள்ள வாகன பழுதுபார்ப்பு பட்டறையில் நேற்றிரவு ஏற்பட்ட தீ விபத்தில் 37 கார்களும் ஏழு மோட்டார் சைக்கிள்களும் நாசமாயின.
இந்த தீவிபத்து தொடர்பில் நேற்றிரவு 11.31 மணியளவில் தாங்கள் புகாரைப் பெற்றதாக சிலாங்கூர் மாநில தீயணைப்பு மற்றும் மீட்புத் துறையின் நடவடிக்கை பிரிவு உதவி இயக்குநர் அகமது முக்லிஸ் முக்தார் கூறினார்.
இதனைத் தொடர்ந்து ஷா ஆலம் மற்றும் புக்கிட் ஜெலுத்தோங் தீயணைப்பு நிலையங்களிலிருந்து 21 அதிகாரிகள் மற்றும் உறுப்பினர்கள் அடங்கிய குழு மூன்று தீயணைப்பு வண்டிகள் மற்றும் ஒரு தண்ணீர் லோரியுடன் சம்பவ இடத்திற்கு விரைந்ததாக அவர் தெரிவித்தார்.
சம்பவ இடத்தை அடைந்த போது ஏ பிரிவு கட்டிடத்தில் செயல்பட்டு வந்த 50x100 சதுர அடி பரப்பளவிலான வாகன பழுதுபார்ப்பு பட்டறையின் 90 விழுக்காட்டுப் பகுதி தீயில் அழிந்து விட்டதை அவர்கள் கண்டதாக அவர் சொன்னார்.
இந்த சம்பவத்தின் போது அந்த பட்டறையில் இருந்தவர்களுக்கு உயிருடற்சேதம் ஏற்படவில்லை. எனினும், கார்களை அப்புறப்படுத்த முயன்ற நபர் ஒருவருக்கு கையில் தீக்காயம் ஏற்பட்டது என்று அவர் அறிக்கை ஒன்றில் குறிப்பிட்டார்.
அந்த ஆடவர் குடும்ப உறுப்பினர்களால் மருத்துவமனைக்கு கொண்டுச் செல்லப்பட்ட வேளையில் அவரின் உடல் நிலை சீராக உள்ளதாக அவர் கூறினார்.
இந்த விபத்துக்கான காரணம் குறித்து விசாரிக்கப்பட்டு வருகிறது என்று அவர் சொன்னார்.
