மலேசியாவில் இன்று மாலை முழு பெருநிலவு தோன்றும்

கோலாலம்பூர், ஜூலை 13 - இன்று மாலை 5.09 மணிக்கு நிகழும் என்று எதிர்பார்க்கப்படும் சூப்பர் மூன் எனப்படும் முழுப் பெருநிலவு நிகழ்வைக் காண மலேசியர்கள் மீண்டும் ஒருமுறை வாய்ப்பைப் பெற்றுள்ளனர்.

பெரிஜி என குறிப்பிடப்படும் சந்திரன் பூமிக்கு மிக அருகில் அதாவது 357,263 கிலோ மீட்டர் தொலைவில் இருக்கும் போது இந்த நிகழ்வு ஏற்படும் என்று மலேசிய விண்வெளி நிறுவனம்  அதன் அதிகாரப்பூர்வ அகப்பக்கம் வழியாக தெரிவித்தது.
சந்திரன் 0.0549 என்ற சராசரி விசித்திரத்துடன் நீள்வட்ட சுற்றுப்பாதையில் பூமியைச் சுற்றி வருகிறது. ஆகவே, பூமியிலிருந்து சந்திரனின் சராசரி தூரம் எல்லா நேரங்களிலும் மாறுபடும், நெருங்கிய சராசரி தூரம் (பெரிஜி) 363,396 கிலோ மீட்டர் மற்றும் தொலைதூர சராசரி தூரம் (அபோஜி) 405,504 கிலோ மீட்டர் ஆகும்.
சூப்பர்மூன் நிகழ்வின் போது, ஒரு முழு நிலவு சாதாரண முழு நிலவை விட ஏழு சதவீதம் அதிகமாகவும் 'மைக்ரோமூனை விட 14 சதவீதம் பெரியதாகவும் 30 சதவீதம் பிரகாசமாகவும் தோன்றும் என்று அது கூறியது.
மிக சமீபத்திய சூப்பர் மூன் நிகழ்வு ஜூன் 14 அன்று நிகழ்ந்தது மற்றும் லங்காவி தேசிய கண்காணிப்பு தொலைநோக்கி அமைப்பு மூலம் படம் வெற்றிகரமாக பதிவு செய்யப்பட்டது